भारतबाट सिके राउतका लागि आयो यस्तो ‘गिफ्ट’

सिके राउतका लागि भारतको गिफ्ट स्वरुप प्रधानमन्त्री प्रचण्डले जनमत पार्टीबाट सरकारमा मन्त्री ल्याउने पहलमा लाग्नुभएको माओवादी केन्द्रका एक नेताले टिप्पणी गर्नुभयो ।

प्रधानमन्त्री पुष्पकमल दाहाल ‘प्रचण्ड’ भारतको चारे दिने भ्रमण सकाएर स्वदेश फर्किसक्नु भएको छ । जेठ १७ गते गएर २० गते उहाँ स्वदेश फर्किनु भयो । तर नेपाल फर्केको १० दिन भइसक्दा पनि त्यसका ‘साइड इफेक्ट’हरु अझै बाँकी छन् । संसदमा बजेटभन्दा पनि प्रधानमन्त्री प्रचण्डको भारत भ्रमणलाई चर्चाको विषय बनाएको छ ।

मुर्रा जातका राँगोदेखि गेरुवा वस्त्रसम्मको चर्चाले ठाउँ पाएका छन् । तर त्यहाँ भएका प्रमुख सम्झौताहरुको बारेमा कुनै चर्चा छैन । १० हजार मेगावाट बिजुली खरिददेखि पाइपलाइन निर्माणसम्म, जलविद्युत परियोजनादेखि रेल्वे लाइन विस्तारसम्मको सम्झौता भएको हो तर संदन र सडकमा त्यसको कुनै चर्चा छैन । यसपटकको भ्रमणमा राजनीतिक मुद्दा भन्दा पनि आर्थिक मुद्दाले प्राथमिकता पायो, यसले आर्थिक समृद्धिको लागि सहयोग पुग्ने विश्वास गर्न सकिने विश्लेषकहरुको भनाई छ ।

तर, अर्थ राजनीतिक विश्लेषक हरि रोक्का भन्नहुन्छ, ‘भारतले जति पनि सम्झौता गरेको छ ती आफूलाई फाइदा हुने व्यावसायिक सोचका साथ मात्र गरेको छ । चाहे बिजुली खरिदका कुरा होस् या जलविद्युत निर्माणको कुरा होस् या क्रश बोर्डर डिजिटल पेमेन्टको कुरा किन नहोस् सबैमा भारतले आफ्नो फाइदा देखेर यी सम्झौता गरेको हो ।’ तर प्रधानमन्त्री प्रचण्डका राजनीतिक सल्लाहकार हरिबोल गजुरेलले भन्नुहुन्छ, ‘यसपालीको भारत भ्रमणमा ‘ब्रेक थ्रु’ भएको हो, सम्बन्ध नयाँ उचाईमा पुगेको छ ।’

भारत भ्रमणले नेपालको सम्बन्धमा कति ‘ब्रेक थ्रु’ भयो त्यो त आउने दिनमा त्यसको प्रभाव र दबावले पुष्टि गर्छ नै तर मधेशका लागि केही भएको छ भने प्रष्ट देखिन थालेको छ । प्रधानमन्त्री प्रचण्ड फर्केपछि डा.सिके राउत नेतृत्वको पार्टी जनमत पार्टीलाई सरकारमा ल्याउन पहल सुरु भएको छ । यो भारत भ्रमणकै प्रभाव हो । भारत भ्रमणको मिति तय भएकै दिन जनमत पार्टीका अध्यक्ष सिके राउत आफ्ना केही गुनासाहरु लिएर प्रचण्डमाथि दबाव बढाउन जेठ १३ गते भारत पुग्नुभएको थियो ।

प्रधानमन्त्री प्रचण्डको भारत भ्रमण हुन लागेको छ, सो क्रममा मधेशको विषयमा पनि कुराकानी होस् भनि दबावका लागि आफू भारत गएको सिके राउतले भन्दै आएको कुराले पनि पुष्टि हुन्छ कि उहाँले अहिलेको वर्तमान सरकार, गठबन्धनमा स्पेश बनाउन त्यता जानु भएको थियो । त्यसकै प्रभाव हो, प्रधानमन्त्री प्रचण्ड भारतबाट फर्केपछि जनमत पार्टीलाई संघीय सरकारदेखि केन्द्रिय सरकारसम्म सेटिङ गर्न लाग्नु भएको छ ।

सिके राउतका लागि भारतको गिफ्ट स्वरुप प्रधानमन्त्री प्रचण्डले जनमत पार्टीबाट सरकारमा मन्त्री ल्याउने पहलमा लाग्नुभएको माओवादी केन्द्रका एक नेताले टिप्पणी गर्नुभयो । त्यसका लागि उहाँले जनमत पार्टीका अध्यक्ष सिके राउतसँग छलफल गर्नुको साथै गठबन्धनमा पनि छलफल सुरु गर्नुभएको छ ।

मन्त्रीपरिषद्ले पूर्णता पाइसकेका हुनाले कुन मन्त्रीलाई हटाउनेमा अन्योल देखिएको छ । माओवादी केन्द्रका अध्यक्ष समेत रहनु भएका प्रधानमन्त्री प्रचण्डले आफ्नै पार्टी वा काँग्रेसबाट एक जना मन्त्री हटाएर जनमत पार्टीबाट मन्त्री बनाउने तयारीमा हुनुहुन्छ तर कसलाई हटाउने विषयमा अन्योल देखिएको छ । माओवादीबाट समान्य प्रशासन मन्त्री बनेका अमनलाल मोदी वा पर्यटन मन्त्री सुदन किराँतीमध्ये एउटालाई हटाएर जनमतका मन्त्रीलाई राख्ने विषयमा पनि छलफल चलिरहेको छ ।

तर प्रचण्डका लागि त्यो पनि सजिलो छैन । आफू प्रधानमन्त्रीमा कामय रहन सबै कुरा गुमाउँदै आउनु भएका प्रधानमन्त्री प्रचण्डले भएका मन्त्रीलाई पनि हटाएर अरु पार्टीलाई राख्ने कुरालाई उहाँकै पार्टीका नेताहरुले मान्ने पक्षमा देखिएका छैनन् । राष्ट्रपति, उपराष्ट्रपति, सभामुख, उपसभामुखमध्ये एउटा पनि माओवादीको भाग परेको छैन । त्यसले पार्टीमा त्यतिकै विवादको विषय बनेको छ ।

अहिले आफ्नै पार्टीका मन्त्रीलाई हटाएर जनमत पार्टीलाई भित्र्याउने कुरामा पार्टी सहमत हुन सक्दैन भनि स्रोतहरुले दावी गरेका छन् । पार्टीका नेता वर्षमान पुन र जनार्दन शर्मा नै यो कुरा मान्न तयार देखिनु भएको छैन । कृष्णबहादुर महाराले प्रचण्डलाई सहयोग गरे पनि वर्षमान र जनार्दन त्यो पक्षमा नदोखिएको स्रोतले दावी गरेको छ । वर्षमान पुन उपचारका लागि चीनमा हुनुहुन्छ । एक दुई दिनमै नेपाल फर्किने कार्यक्रम रहेको बुझिएको छ । त्यसपछि पार्टीमा थप कुराहरु अगाडि बढ्ने बुझिएको छ ।