सप्तरीमा रहेको इन्टेलेक्चुअल फाउण्डेशन नेपालले जनतासँग माओवादी, तराई मधेश जागरण अभियानका लागि तराई मधेशमा रहनु भएका माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल “प्रचण्ड”लाई मधेशको शिक्षाको अवस्था बारे जानकारी गराएको छ ।
फाउण्डेशनले माओवादीका अध्यक्ष प्रचण्डलाई फागुन १६ गते राजविराजमा ज्ञापनपत्र बुझाउदै सो ज्ञानकारी गराएको हो । मधेशको शिक्षा बिग्रिनुमा फाउण्डेशनले १३ वटा कारण देखाएको छ । विद्यालयमा व्यवस्थापन समितिका राजनीतिक हस्तक्षेप, विद्यार्थी सँख्या अनुसार दरबन्दी नहुनु, शिक्षकलाई विद्यालयले प्रशासनिक काममा लगाउनु, संघीय सरकार, प्रदेश सरकार र स्थानीय सरकार एक अर्काका भरमा बसेर शिक्षाप्रति उदासिन रहनुले शिक्षाको अवस्था कमजोर भएको दावी फाण्डेशनले गरेको छ ।
त्यस्तै, शिक्षा क्षेत्रमा पर्याप्त बजेट लगानी नहुनु, राजनीतिक दलले शिक्षामा ध्यान नदिनु, विद्यालयमा नातावाद, कृपावाद देखिनु, विद्यालयका भौतिक अवस्था कमजोर हुनु, शिक्षक कर्मचारीका छोराछोरी सामुदायिक विद्यालयमा नपढ्नु, विद्यालयमा दलगत प्रभाव पार्नु र व्यवस्थापन समितिले विद्यालयका हेडमास्टरलाइ प्रभावमा पार्नु, मातृभाषालाई प्राथमिकतामा नराख्नु, सरकारले शिक्षामा प्रयाप्त बजेट नदिएको कारण शिक्षाको अवस्था दैनिय भएको दावी फाउण्डेशनले गरेको छ ।
संघीय सरकारले कूल बजेट कम्तिमा २५ प्रतिशत, प्रदेश सरकारले कूल बजेटको कम्तिमा २० प्रतिशत र स्थानीय सरकारले कूल बजेटको १५ प्रतिशत बजेट शिक्षामा लगानी गर्न बाध्यात्मक कानून बनाउन फाउडेशनका अध्यक्ष डा.सूर्यप्रसाद यादवले माग गर्नुभएको छ । राष्ट्रिय जनगणना २०७८ अनुसार मधेश प्रदेशको साक्षरता दर ६३.५५ प्रतिशत मात्र रहेको छ जुन काठमाडौंको नजरमा रहेको दुर्गम प्रदेश कर्णालीको साक्षरता दर ७६.१ प्रतिशत भन्दा पनि कम हो । जवकि नेपालको संविधान २०७२ को ३१ सौं धारामा नेपालमा बसोवास गर्ने प्रत्येक नेपाली समुदायलाई शिक्षा पाउने हकको सुनिश्चितता गरिएको छ । तर यो विषय तीन तहको प्राथमिकतामा नपरेको गुनासो गर्दै अध्यक्ष यादवले शिक्षाको सुधारका लागि पहल गर्न अध्यक्ष प्रचण्डलाई आग्रह गर्नुभयो ।
तपाईको प्रतिक्रिया