काठमाडौ फागुन १६ गते । २०७९ सालको प्रतिनिधिसभा निर्वाचनमा जनमत पार्टीलाई अप्रत्याशित सफलता दिलाउन वैदेशिक रोजगारमा रहेका नेपाली, विशेषगरी खाडी मुलुकमा कार्यरत मधेशी समुदायको भूमिका निर्णायक थियो । तर यसपटकको चुनावी माहोल हेर्दा त्यही मताधार जनमत पार्टीबाट क्रमशः टाढिँदै गएको देखिन्छ ।
गत निर्वाचनमा जनमत पार्टीका अध्यक्ष सिके राउतले ‘एक घर एक रोजगार’ जस्ता लोकप्रिय नारासहित वैदेशिक रोजगारमा रहेका मधेशी युवालाई आकर्षित गर्नुभएको थियो । सोही आश्वासनपछि खाडी मुलुकमा रहेका धेरै नेपाली आफैं नेपाल आएर मतदान गरे भने कतिपयले उतैबाट परिवारजनलाई जनमत पार्टीमा मत हाल्न आग्रह गरेका थिए । चुनावी चन्दा र संगठनात्मक सहयोग पनि ठूलो मात्रामा विदेशबाट आएको थियो । यस अर्थमा, जनमत पार्टीको वास्तविक शक्ति केन्द्र वैदेशिक रोजगारमै रहेका मधेशी समुदाय नै थियो ।
यसको पृष्ठभूमि अझ गहिरो छ । सिके राउत स्वयं विदेशमा रहँदा गैरआवासीय मधेशी संघ गठन गरी खाडी मुलुकमा संगठन विस्तार गर्नुभएको थियो । एक समय खाडी मुलुकमा रहेका मधेशीहरूमाथि उहाँको प्रभाव एकछत्र थियो । पार्टीका गतिविधि र आर्थिक स्रोतसमेत त्यहीँबाट सञ्चालन हुने गर्थे । तर पछिल्ला वर्षहरूमा त्यो संरचना क्रमशः कमजोर हुँदै गयो ।
सिके राउत जनमत पार्टी गठन गरेर नेपालमै केन्द्रित भएपछि गैरआवासीय मधेशी संघ लथालिङ अवस्थामा पुगेको देखिन्छ । पार्टीभित्रको आन्तरिक विवादले उक्त संघलाई झनै निष्क्रिय बनायो । अहिले सो संघ विवादमै अल्झिएको छ र ठोस गतिविधि देखिँदैन । यही शून्यताले खाडी मुलुकमा नयाँ शक्ति उदय हुन मार्ग प्रशस्त गरेको छ ।
त्यही शक्ति हुनुहुन्छ, डा. बबी सिंह । जनता समाजवादी पार्टी नेपालबाट सप्तरी–४ मा उम्मेदवार रहनुभएका बबी सिंह वैदेशिक रोजगारमा रहेका मधेशी समुदायका लागि नयाँ आशा बन्नुभएको छ । उहाँ स्वयं लामो समय विदेश बसेर गैरआवासीय मधेशी संघमा सक्रिय रहनुभएको थियो, जसका कारण खाडी मुलुकमा रहेका धेरै मधेशीहरूसँग उहाँको व्यक्तिगत चिनजान छ ।
तपाईको प्रतिक्रिया