सिरहा २३ गते
हुलाकी राजमार्गअन्तर्गत धनुषा र सिरहा जोड्ने कमला नदीको अलपत्र पुल निरीक्षण गर्न पुगेका पूर्वाधार विकासमन्त्री सुनिल लम्साल स्थानीय बासिन्दाको घेराउमा परेका छन्। पुल निर्माणको सुस्त गति र जनसरोकारका विषयमा कुनै प्रतिक्रिया नदिई हिँड्न खोजेपछि आक्रोशित स्थानीयले शनिबार मन्त्रीको गाडी रोकेर घेराउ गरेका हुन् ।
पुलको वस्तुस्थिति बुझ्न निर्माणस्थल पुगेका मन्त्री लम्सालले स्थानीय बासिन्दा र सञ्चारकर्मीलाई कुनै सम्बोधन वा प्रतिक्रिया नदिई उम्किन खोजेका थिए। तर, स्थानीयले गाडी नै घेरेर अवरोध गरेपछि मन्त्री लम्साल बाध्य भएर गाडीबाट ओर्लिएका थिए । स्थानीय अगुवाहरूले मन्त्रीसँग पुल कहिलेसम्म बनिसक्छ भन्दै ठोस प्रतिबद्धता माग गरेपछि मन्त्रीले तत्कालै निर्माण व्यवसायीसँग जवाफ मागेका थिए ।
घेराउकै बीच लुम्बिनी बिल्डर्स जेभीका ठेकेदार विष्णु शर्माले आगामी १५ दिनभित्र सर्वसाधारण आवतजावत गर्न मिल्ने गरी पुल सञ्चालनमा ल्याउने आश्वासन दिएपछि मात्र स्थानीयले मन्त्री र ठेकेदारलाई छाडेका थिए। मन्त्रीलाई घेर्नुअघि स्थानीयले ठेकेदार शर्मालाई समेत घेरेर आक्रोश पोखेका थिए ।
१५ वर्षे बेथिति र तथ्यहरू
कमला नदीको यो पुल राज्यको उदासीनता, ठेकेदारको चरम लापरवाही र प्राविधिक त्रुटिको एउटा जीवन्त नमूना बनेको छ। यस पुलको विगतदेखि वर्तमानसम्मको तथ्यगत विवरण यसप्रकार छ:
-
पुलको स्वरूप र प्रारम्भिक लागत: हुलाकी राजमार्ग अन्तर्गत पर्ने यो पुलको लम्बाई ४ सय ७० मिटर र चौडाई ११ मिटर रहेको छ। यो पुल २४ करोड ९१ लाख रुपैयाँको लागतमा निर्माण सुरु गरिएको थियो।
-
पहिलो ठेक्का र शिलान्यास (२०६८ मंसिर): साढे तीन वर्षभित्र निर्माण कार्य सम्पन्न गर्ने गरी २०६८ साल मंसिरमा पप्पु लुम्बिनी बिल्डर्स जेभी कन्स्ट्रक्सनले यसको ठेक्का पाएको थियो। तर, तोकिएको समयमा काम नसकी पटक-पटक म्याद थपेर आयोजना अलपत्र पारियो ।
-
जनआन्दोलन र ठेक्का परिवर्तन (२०७६ असोज): ठेकेदारको लापरवाहीविरुद्ध ‘हुलाकी सडक संघर्ष समिति’ले रिले अनशनसहितका आन्दोलन गरेपछि सरकारले पप्पु कन्स्ट्रक्सनको ठेक्का रद्द गर्यो। २०७६ असोज १ गते बाँकी काम पूरा गर्ने जिम्मेवारी लुम्बिनी बिल्डर्स कन्स्ट्रक्सनलाई दिइयो, जसको म्याद २०७८ असार १३ गतेसम्म तोकिएको थियो ।
-
उद्घाटन अगावै पुल भासियो (२०७८ असार १७): दोस्रो ठेकेदारले काम सकेर उद्घाटनको तयारी गरिरहेकै बेला २०७८ असार १७ गते आएको सामान्य बाढीलाई समेत थेग्न नसकेर पुलको पिलर धसियो र स्पानहरू भासिए ।
-
अख्तियारको अनुसन्धान र वर्तमान अवस्था: पुल निर्माणको सुरुवाती डिजाइनमै गम्भीर त्रुटि रहेको कुरा बाहिर आएपछि यस विषयमा अख्तियार दुरुपयोग अनुसन्धान आयोगले विगत लामो समयदेखि छानबिन गरिरहेको छ ।
-
स्थानीयको माग: पुल भासिएको ५ वर्ष पुग्न लाग्दा समेत पुनर्निर्माण सम्पन्न हुन सकेको छैन। स्थानीय अगुवाहरूले त्रुटिपूर्ण पुरानै संरचना टाल्नुको सट्टा नयाँ डिजाइनसहित बलियो पुल निर्माण गर्नुपर्ने माग राख्दै चरणबद्ध आन्दोलन गर्दै आएका छन् ।
तपाईको प्रतिक्रिया