यदि तपाई रेडियो वीरगञ्जको नियमित स्रोता हुनुहुन्छ भने पक्कै पनि ‘खटमिठी’ कार्यक्रम सम्झनु भएको होला । त्यसपछि पक्कै पनि त्यसमा मिठी (मिठो) अवाज दिने बारा कोल्हवीका प्रतिमा चौधरीलाई सम्झनु हुन्छ । अहिले त्यो रेडियोमा प्रतिमा चौधरीको सुरिलो र मिठी अवाज सुन्न पाइदैन तर त्यसको मिठो सम्झाना पक्कै पनि वीरगञ्जवासी तथा त्यस वरपरका स्रोताहरुसँग छन् होला ।
‘खटमिठी’ कार्यक्रम यति पपुलर थियो कि प्रत्येक दिन रेडियोको अगाडि प्रतिमा चौधरीलाई एक झलक हेर्नका लागि स्रोताहरुको भिड हुने गथ्र्यो । कहिले काही प्रतिमालाई चोर बाटोबाट निस्केर जानु पथ्र्यो । एकपटक एकजना वृद्धले आठ विघा जमिनको लालपूर्जा लिएर प्रतिमा चौधरीलाई भेट्न रेडियोमा पुग्नु भएको थियो ।
एकजना कसैले प्रतिमा चौधरी ओम आश्रमतिर जानुभयो भनेपछि उहाँ त्यतितिर कुदेर जानुभएको थियो । उहाँ प्रतिमालाई भेट्नका लागि करिब महिनासम्म रेडियोमा दौडधुप गर्नुभयो । तर प्रतिमासँग उहाँको भेट भएन । प्रतिमा भन्नुहुन्छ, ‘त्यतिबेला मेरो यस्तो क्रेज थियो कि मन पराएका स्रोतले मेरो लागि जे पनि गर्न सक्थे त्यही डरले म अगाडि जाँदैन्थे ।’
प्रतिमाको त्यो कार्यक्रमको लागि पत्रहरु बोराका बोरा आउथे कतिपय स्रोतले आफ्नो रगतले समेत चिठी लेखेर पठाउथे । प्रतिमालाई विभिन्न प्रस्तावसहित गिफ्टहरु आउथे । त्यो रेडियोमा सबभन्दा बढी स्पोन्सर सोही कार्यक्रममा थिए । त्यही कार्यक्रमका कारण रेडियो चर्चित पनि थियो र आर्थिक रुपले सबल पनि । ‘खटमिठी’ कार्यक्रममा प्रतिमा ‘विजुलीया’को भूमिका हुनुहुन्थ्यो भने अर्को एकजना केटा प्रवेज आलम ‘रामलखन’को भूमिकामा हुन्थ्यो । तीन वर्षसम्म त्यो कार्यक्रम चल्यो । त्यसपछि त्यस्तै कार्यक्रम ‘नोकझोक’ पनि चलाउनुभयो । नोकझोक पनि सुपरहिट प्रोग्राम भयो तर ‘खटमिठी’ को ठाउँ लिन सकेन ।
प्रतिमा चौधरीले त्यो रेडियोमा ‘ताल से ताल मिला’, ‘जिन्दगी के सफर’, ‘धुम मचाले रंग जमादे’, ‘संगित बाहार’, ‘अपन प्लेउड’, ‘बायोग्राफि’, ‘मस्ती मस्ती’, ‘नाइन्टी नाइन म्यासेज अनलाइन’, ‘इग्लिसबाबु देशी मेम’, ‘मनको झङ्कार’ लगायतका थुप्रै कार्यक्रम चलाउनु हुन्थ्यो ।
तपाईको प्रतिक्रिया